ಬಾಳಗೆಳೆಯನಿಗೆ

ಬಾಳಗೆಳೆಯನಿಗೆ 

ಮೈಯುದ್ದಗಲಕ್ಕೂ ಹರಡುವ ರೋಮಾoಚನ ಜಾತ್ರೆಯಲ್ಲಿ 

ಬರೆದ ಬಣ್ಣ ಬಣ್ಣದ ಆಸೆಗಳ ಮೂಲಕ್ಕೆ ಮುತ್ತಿಟ್ಟ ಪ್ರಿಯವೇ 

ಈ ಅಲುಗುವಿಕೆಯ ,ನುಲುಗುವಿಕೆಯ ಮೆತ್ತನೆ ಸ್ಪರ್ಶದಲ್ಲಿ 

ಬಿದ್ದು ಬಿಡುವ ಅಸೆಯಿದೆಯಲ್ಲಾ ನಿನ್ನ ರಸಿಕತೆಯಾಳದಲ್ಲಿ . 

ಬದುಕಿನ ಬಂಡಿಯನ್ನು ಮುಂದೆ ಮುಂದೆ ದೂಡುತ್ತಲೇ ಕಾಲ ಗರ್ಭದಲ್ಲಿ 

ಸೇರಿ ಹೋದ ಕೋಟಿ ಕ್ಷಣಗಳಿಗೆ ನಿಮೀಲಿತ ಕಂಗಳಲ್ಲಿ ಬೆಳಕನ್ನಿಡುತ್ತಾ 

ತೋಳೊಳಗೆ ಸೇರಿದ ಕೈ ಬಿಸಿಯಪ್ಪುಗೆಯಲ್ಲಿ ಚಲಿಸುತ್ತಲೇ 

ಮನದ ಹಬ್ಬವಾದ ಹಿತದ ಬಿಗಿತಕ್ಕೆ ಕಾದಿದೆ ಪಲ್ಲವವಿಲ್ಲಿ . 

ನಿದ್ರಿಸಿದರೆ ಕನಸುಗಳಲ್ಲೂ ,ಎಚ್ಚರವಿರೆ ಇರುವೆಲ್ಲೆಲ್ಲೂ ಕಾಡುವ

ಭೂ ಸ್ಪರ್ಶಗೊಂಡ ಮಳೆಹನಿಯಂತೆ ಸಾರ್ಥಕವಾಗುತ್ತಾ ,ತಂಪ ಬೇಡುತ್ತಾ 

ಕಾವಿಗೆ ಬೆರಳಿಟ್ಟು,ಮಳೆಗೆ ತುಟಿಯಿಟ್ಟು ಪುನ: ಕಾಯುತ್ತಲೇ 

ರಸಿಕತೆಯಲಿ ಕಟ್ಟಿದ ಶೃoಗಾರ ಮಹಲಿನಲಿ ಬಾಳುವುದಿದೆಯಲ್ಲಾ ಸುಖವಿಲ್ಲಿ