ಸಹಸ್ರಾರ ಮತ್ತು ಮೂಲಾಧಾರ

ಹೃದಯದ ಒಳಗಿನ ನೋಟ

ದೇಗುಲವಿದು ನಿನ್ನ ಹೃದಯ ಕಾಲ್ತೊಳೆದು ಒಳ ಬಂದೆ
ಗಂಟೆ ಜಾಗಟೆಗಳ ಸದ್ದು ನವಿರು ಧೂಪದ ಘಮ
ಹೂಗಳ ಸುವಾಸನೆ ... ಹೂ ಹಾರಗಳ ಬಣ್ಣದ ಅಲಂಕಾರ
ಕ್ಷಿತಿಜದಷ್ಟು ಎತ್ತರದ ಆಸೆಗಳು ಮತ್ತು ಭೂಮಿಯಷ್ಟು ಭಾರ.....

ಜಗುಲಿಯಿದು ಸೂರ್ಯನ ಬಿಸಿಲ ಹೀರಿ ಉಪ್ಪರಿಗೆಯ ನೆರಳ ಗಾದಿ
ಚೆಲ್ಲುವಲ್ಲಿ ಒಂದಷ್ಟು ಜಾಗೆ ಕೊಟ್ಟದ್ದೇ ನನ್ನ ಹಿರಿಮೆ ...
ಶಿಲ್ಪ ವಿನ್ಯಾಸಗಳ ಕೆತ್ತಿದ ಸುಂದರ ಕಂಭಗಳ ನಡುವೆ
ವಿರಮಿಸಲಿಲ್ಲಿ ರೇಸಿಮೆಯ ಹಾಸಿಗೆ ... ಅದ್ಭುತ ಚೆಲುವಿನ ಹೃದಯ

ಸಂಗೀತಗಳ ಸುಸ್ವರ ನಾಟ್ಯ ನವಿಲಿನ ಲಾಲಿತ್ಯ ತುಂಬಿ ಹರಿಯುವಿಲ್ಲಿ
ದಂಗಾದೆ ಮರುಳಾದೆ ಸೋತೆ ಅದೆಷ್ಟು ಚೆಲುವಿನ ಒಳಗು ನಿನ್ನೆದೆ
ಕರೆದುಕೊಂಡದ್ದಕ್ಕೆ ನಮನ ಪರಿಸರದ ಹಸಿರಿಗೆ ಸೋತಿದ್ದೇನೆ
ಕರುಣೆ ಪ್ರೀತಿ ಕಂಬನಿಗಷ್ಟು ಅಪ್ಪುಗೆ ಎಲ್ಲವೂ ಇಲ್ಲಿದೆ ....

ಮತ್ತು

ಗರ್ಭಗುಡಿಯಲ್ಲಿ ಕಂಡೆ ಕನ್ನಡಿಯನ್ನ
ಕಣ್ ನಂಬುತ್ತಿಲ್ಲ ಈ ಸತ್ಯವನ್ನ ....