ಸಹಸ್ರಾರ ಮತ್ತು ಮೂಲಾಧಾರ

ಒಲವೇ ನಿನ್ನ ಕಣ್ಣ ಬಿಂಬವಾಗಿ ,ಉಸಿರ ಜೀವ ಕಣವಾಗಿ 
ನನ್ನ ಚಿತ್ರ ಬರೆದಿರುವಾಗ ... ,ನೀನಿರದ ನೀನು ನನಗೇಕೆ ?
ಒಲವಿರದ ಒಣ ಮಾತಾದರೆ ವಿರಹಿಸುವ ಸುಡು ಮೌನವೇಕೆ 
ನನ್ನವರೆಗೂ ಪ್ರಜ್ವಲಿಸುವ ದೃಷ್ಟಿಯೇಕೆ 
ಕನ್ನಡಿಯ ಎದುರಿಸದ... ಹೇಗೆಂದರೆ ಹಾಗೆ ಹಾರುವ ಕೂದಲೇಕೆ 
ನಿರ್ಲಕ್ಷ್ಯದ ನಡಿಗೆ ಹೃದಯ ಬೆರೆಸುವ ನುಡಿಗಳೇಕೆ
ಬಿಡಲಾರೆಯಾದರೆ ನನ್ನ... ಎದೆ ಹೊರಬಾಗಿಲಿಗೆ ಬೀಗವೇಕೆ
ದೂರವಾಗುವ ನನ್ನೆಡೆ ಧಾವಿಸುವ ನಿನ್ನoತರಂಗದ ಉದ್ವೇಗವೇಕೆ
ನಾನಿರದೇ ಇರಬಲ್ಲೆಯಾದರೆ ಸೇತುವೆ, ಕೊಂಡಿಗಳೇಕೆ
ಕ್ಷಣಕ್ಕೊಮ್ಮೆ ಗಳಿಗೆಗೊಮ್ಮೆ ಬಿಗಿದಪ್ಪುವ ನೋಟವೇಕೆ
ಒಲವ ಪತ್ರಗಳ ಕಂಡು ಕಣ್ಣ ತುದಿಗೆ ಆ ಹನಿಯೇಕೆ
ನನ್ನ ಕಾಣದೇ ವಿಲಪಿಸುವ ಹಂಬಲವೇಕೆ
ಬೇಡ ಬಿಡು ಬಿಟ್ಟು ಬಿಡು ನನ್ನ ,ನಿನ್ನ ಹೃದಯದ ಹೊರಗೆ...
ಒಮ್ಮೆ ಹಾಗಾದರೆ ಉಳಿವೋ ಸಾವೋ ನಿನಗಂತೂ ಸುಖದ ಉಸಿರಲ್ಲವೇ ?